telegram lider-press

29 жніўня ў невялічкім горадзе Чэрвені адгудзела VІІ абласное свята-конкурс майстроў саломапляцення “Саламяныя дзівосы”.

Міншчына пачала адзначаць такое свята аж у 1997 годзе. Праходзіць яно раз у тры гады. Упершыню аматары саломапляцення збіраліся ў Мар’інай Горцы. Затым эстафету пераймалі Уздзенскі, Валожынскі, Маладзечанскі, Дзяржынскі і Нясвіжскі раёны.

Сёлета ў Чэрвені вынікамі сваёй працы дзяліліся майстры з 12 раёнаў Мінскай вобласці. 108 умельцаў прыехалі на свята-конкурс, а сярод іх больш за палову - дзеці.

“Саламяныя дзівосы” складаюцца з дзвюх частак: выстава гатовых работ і конкурс на хуткасць і якасць пляцення вырабу. Чаго толькі ні пабачыш на выставе! Тут і прывезеныя майстрамі ўзоры саламянай анімалістычнай пластыкі, і лялькі, і ўтылітарна-дэкаратыўныя вырабы, саламяны посуд, саламяныя кветкі, павукі, птушкі, нават саламяныя шахматы.

Конкурс на хуткасць і якасць пляцення доўжыцца тры гадзіны.  Кожны з удзельнікаў выконвае твор па адной з 15 намінацый конкурсу: фігурку коніка, козліка, птушкі, лялькі, павука рамбічнай канструкцыі, плоскую і круглую пляцёнку, аплікацыю саломай па дрэве ці тканіне, саламянае пудзіла.

Акрамя конкурснай праграмы, праводзіўся майстар-клас па вырабу саламянага коніка. Ацэньвала конкурсныя работы кампетэнтнае журы.

Нам, жыхарам Салігоршчыны, гэтае свята цікава не толькі таму, што тут адбываецца творчае яднанне тых, хто вырабляе дзівосы з саломкі, але і таму, што на ім большасць узнагарод і перамог атрымалі нашы таленавітыя землякі. У свяце-конкурсе ўдзельнічалі прадстаўнікі Салігорскага раёна, якія здзівілі журы сваімі вырабамі. А калі падрабязней, то дзіцячай народнай студыі “Валошкі” дасталася перамога ў намінацыі “Лепшы сямейны калектыў”. Гэтая студыя з вёскі Доўгае існуе ўжо дзесяткі гадоў. Зараз разам з таленавітай маці – Ірынай Валатовіч - працуе яе не менш таленавітая дачка Марыя. У Ірыны Валатовіч таксама першае месца ў намінацыі “Лепшая саламяная скульптура”. Парадавалі прадстаўнікі Старобінскага раённага цэнтра рамёстваў. Другое месца ў намінацыі “За творчае развіццё традыцый саломапляцення” ў Любові Купрыяновіч, другое месца ў намінацыі “Лепшая аплікацыя саломай па цвёрдай паверхні” ў Алы Кацяк. Яніна і Алена Сцешыц атрымалі два дыпломы ў намінацыі “За асабісты ўклад у адраджэнне і развіццё традыцый саломапляцення”. А колькі ўзнагарод у прадстаўнікоў Цэнтра творчасці дзяцей і моладзі Салігорскага раёна! Самі лічыце! Кіраўнік народнай студыі “Жытнёвы каласок” Таццяна Кудравец атрымала першае месца за лепшую хатнюю калекцыю. Яе вучні Вольга Радзілавец – трэцяе месца за лепшую саламяную скульптуру, Павел Кудравец - другое месца за лепшыя саламяныя кветкі.

Кіраўнік аб’яднання па інтарэсах “Саломка” Наталля Бойка – першае месца за лепшы саламяны капялюш. Яе вучні Марына Рымашэўская і Аляксандра Прылуцкая – дыпламанты.

 Выхаванцы Заслужанага аматарскага калектыву Рэспублікі Беларусь “Беларускі сувенір” Яўген Маёраў – трэцяе месца за зберажэнне і развіццё традыцый саломапляцення, Аляксандр Дзялендзік – трэцяе месца за лепшую аплікацыю на тканіне.

Кіраўнік аб’яднання па інтарэсах “Залатое сонейка” філіяла “Старобінскі № 1” Вольга Русак прывезла з Чэрвеня другое месца – за развіццё мастацкіх традыцый саломапляцення. Яе вучаніца Яўгенія Антановіч – дыпламант.

І самая галоўная навіна. Гран-пры “Саламяных дзівосаў” за высокае прафесійнае майстэрства, мастацкі густ, беражлівыя адносіны да мясцовых традыцый і плённую працу па развіцці традыцый саломапляцення атрымала салігорачка. Гэта кіраўнік народнай студыі “Чароўная саломка” Людміла Царыкевіч. Добры вынік паказалі і яе вучні: Марына Жабенка – першае месца за лепшы саламяны вянок, Данііл Жабенка – дыпламант у намінацыі “Саламяная кветка”.


уладальнiца Гран-пры Людмiла Царыкевiч

- Я і раней удзельнічала ў гэтых святах-конкурсах, заўсёды хвалявалася, а зараз у Чэрвень ехала нейкая заспакоеная, - расказвае ўладальніца Гран-пры Людміла Царыкевіч. – Ведала, што нашы вырабы заслугоўваюць добрых адзнак. Так і атрымалася. Гэта вельмі прыемна ячшэ і таму, што такую перамогу мы атрымалі ў год, калі нашай студыі “Чароўная саломка” спаўняецца 20 гадоў. Усе гэтыя гады я – кіраўнік студыі. Займаюцца тут дзеці з 6 гадоў. Некаторыя хадзілі да мяне 8-10 гадоў, і зараз нават навучэнцы тэхнікума з задавальненнем прыходзяць на заняткі.

Цікава, што кіраўнік студыі спачатку вывучылася на бухгалтара, але заўсёды яе прыцягвала прыгажосць, заўсёды цікавілі вырабы з саломкі. Саломапляценню яна вучылася па кнізе “Вазьмі простую салому”.

Людміла Царыкевіч расказвае, што ў студыі яна таксама праводзіць з дзецьмі святы-конкурсы, дзе ёсць свае дыпламанты і пераможцы. Менавіта праца з дзецьмі натхняе, дорыць шмат ідэй. А саломка, на думку жанчыны, - гэта найлепшы матэрыял для творчасці. Людміла Царыкевіч лічыць, што журы конкурса спадабаліся яе аўтарскія ўнікальныя вырабы: гэта насценныя саламяныя птушкі і пасхальны букет з кветак вярбы.

- Наша студыя і надалей будзе толькі атточваць майстэрства і імкнуцца быць лепшай. Хочацца сказаць ячшэ пра тое, якое значнае мерапрыемства - конкурс “Саламяныя дзівосы”. Ён збірае майстроў, яны дзеляцца напрацоўкамі, камунікуюць паміж сабой, і хоць нам прысуджаюць месцы, але ўсе разумеюць, што робяць адну вялікую справу, - лічыць майстар саломапляцення з Салігорску. – I мы ганарымся, что таксама ў шэрагу пераемнікаў і прадаўжальнікаў традыцый і мастацкага здабытку беларускай традыцыйнай культуры.

Варвара ЧАРКОЎСКАЯ

Фота Святланы Адамовіч

Для добавления комментариев необходимо зарегистрироваться на сайте или войти под уже существующим именем. После чего под статьей появится форма добавления комментария.

Имиджевая чая